前言：今日信報談 Michael Jackson，下星期才有位置登我的科學文章。適逢回歸十二周年，有幸應李智良和 Jenny 的邀請，在《我們的萬言書》撰稿，成此文。《我們的萬言書》今日會在灣仔富德樓對開派發。
「還政蛙民！」……「增加生果蚊！」……「蛙王下台！」……
又是一年一度大集會的日子，平時散居各井的青蛙，今日聚首此井，表達訴求。可惜，蛙王不在。事實上，他從未來過。
蛙王的井，很遙遠。某天，有隻青蛙問蛙王：「你對廿年前人類無故大規模捕殺青蛙，有乜睇法？」蛙王答道：「呢廿年來，人類社會嘅發展得到驕人嘅成就。試諗下，如果佢哋唔係發展得咁好，我哋邊度有咁多井住？我相信廣大青蛙對呢件事會有客觀嘅評價，我亦相信我嘅睇法係代表所有嘅青蛙。」
蛙王沒有說謊。他住的那口井，除他之外，還有八百隻大小青蛙。多年來，他們萬眾一心，意見一致。所以我相信，蛙王的看法就是那八百隻青蛙的看法，蛙王的意見就是那口井內所有青蛙的意見。蛙王身份尊貴，當然不會信口開河。
今天集會，跟往常一樣，標語處處。向左望，見到一個「最低工資30000蚊！」的紙牌，我把咪高峰塞向她的咀邊，問：「點解你有呢個訴求？」她說：「我住嘅嗰口井，生活好艱難架。我比較好彩，每個月閒閒地都捉到三萬幾隻蚊，追求我嗰啲男士，無一個捉蚊夠我多，所以我認為最低工資應該最少三萬隻蚊。到時所有男士都唔洗因為捉蚊唔夠我多而自卑，所有女士亦唔洗擔心男朋友捉蚊少過佢囉。」
向右望，另一個紙牌寫著「反對官商勾結！」，我問：「點解你有呢個訴求？」他答：「我住嗰口井，好清廉架，早前我哋個市長因為貪污，查都唔洗查就立即落台。你哋啲井，睇住個高官同奸商私相授受，都耐佢唔何，我咪諗住將我個井嘅清廉風氣帶啲過嚟囉。」
前面隻青蛙沉不住氣，反問：「既然未查，你又知佢真係貪污？唔俾有青蛙想陷害佢呀？！」「我哋口井就有呢度好，凡事只得一個調子，就係井中央嘅調子，唔似得你哋啲井，隻隻都喺度蛙噏。再講，如果佢真係被陷害，咁即係話佢無貪污啦！我口井點都清廉過你哋。」
後面隻青蛙強作冷靜：「請問一聲，呢個係你個人嘅意見，定係你口井所有青蛙嘅意見？」「有分別咩……」他未說完，不過前面隻青蛙插咀道：「井中央講乜你就信乜，用下腦啦，死蠢！」捉三萬隻蚊那隻不給他半秒喘息機會：「佢已經被洗腦，同佢講都嘥氣啦！」遭圍剿的抓緊那四分一秒的空檔：「我俾井中央洗腦，你哋都係俾佢洗緊腦啫！」指著我。
四對眼睛望著我，三張咀齊聲對我說：「你唔好選擇性報導呀！」「當然唔會啦。」
我心想：「除咗蛙王同佢嗰八百位鄰居因為有井中央庇蔭而唔洗為自己籌謀之外，每隻青蛙都有自己嘅 agenda 架啦。客觀？中肯？全面？傻仔！」
沒有留言:
張貼留言